تحدي الـ 29 يوم - اليوم العشرون -Day20
هاي من صدك صارلنه ٢٠ يوم؟ شبسرعة الايام تركض ركض طبعاً صار ٢٠ يوم من تحديت نفسي بتطوير لغتي الانگليزية منC2 الى A2 والحمدلله اكو تطور ملحوظ وبشكل كبير طبعاً التحدي انو اگضي ٣ ساعات اتعلم انگليزي كل يوم بس بالاسبوع الاخير صار شوية زغل لان كلش جنت مشغول فصرت اقضي من ١-٢ ساعة باليوم
اليوم الـ٢٠
صرت من افتح يوتيوب احس الكلام كله سهل وسلس وافهم الموضوع حتى لو ما فهمت معنى كل المفردات بس افهم الموضوع بالمجمل وحتى صرت من اشوف فلم ترجمته مو كلش مضبوطه اعرف انو هذي الترجمه مسوينه من وره خشومهم واكيد كلش فرحان بهذا التطور بالنسبة للادوات بعدني اعتمد ع اليوتيوب بشكل أساسي واشوف فيدوهات متنوعة بالانگليزي وحتى فيدوهات التحفيز الانگليزيه كلش تنطي حافز وهم تتعلم منها مفردات
من اكثر الفيدوهات الي عجبتني هذا الفيديو
اما بخصوص القنوات التعليمية فبعدني مستمر مع مارينا و أي جي هو
الصراحة قل استخدامي للچات ع التلگرام لان احس المفردات نفسها ومتكرره ولان ماكو ناس نايتف واذا اكو فهمه مو كلش متواجدين بالرغم من انو التدريب والكلام افضل طريقة لكسر حاجز الخجل والكلام افضل شي للتعلم وان شاء الله الگه قنوات ارتاح بيها وصدك سويت حسابي الاحتياطي مال انستگرام بس اجانب وتعرفت ع كم صديق اجنبي بس المشكلة جانت انو التوقيت يختلف يمنا ويمهم 😅واكيد بعدني كلش معجب ومستخدم تطبيق cake هالتطبيق خرافي من صدك
اما بالنهاية هل استفاديت من هذه التحدي بالحياة العملية الجواب: تقريباً قابلت بمنظمة علمود شغل واختبروني بالانگليزي ونجحت حتى عجبتهم الانكليزية مالتي طبعاً الاختبار كلش بسيط ع السكايب وصارت محاوره واسئلة بالانكليزي كتلهم لو اجرينا المقابله بالعربي افضل كالو انو انكليزيتك حيل زينه بالنهايه الشعور الداخلي والشعور بالرضى عن التطور الي حققته هو احلى شي اما بخصوص المنظمة فكالولي اسبوعين ونردلك خبر والله كريم ملاحظة شكد حاولت احمل فيد احجي بي بس النت ضعيف وميحمل
كلش حلوه بالتوفيق
ردحذف